Maður er á Feisbúkk, Twitter og Flickr  … uppfærslur þangað ættu nú að nægja. Svo þegar maður býr svona nálægt öllum þá hverfur þörfin fyrir að tjá sig hérna til að segja frá hvað er að gerast í Fannafoldinni.

Svo nenni ég ekki að skrifa um bankahrun eða æsseiv … er alveg fullsaddur af þeim umræðum öllum saman.

Og hvað á maður þá að skrifa um ? Það er stóra spurningin ….

Megi hann hvíla í friði …

Sumarið kom með sprengju hérna um helgina, líkt og á Íslandi. 20-25 stiga hiti og glampandi sól alla helgina, og á að vera alla vikuna og fram á næstu helgi. Og þessi sumarsprengja var ekki að fara vel í frjókornaofnæmisfólkið hérna úti … það voru víst öll meðul búin í flestum apótekum í Stokkhólmi í gær. Maður verður því að þola hnerrandi konur í lestinni og horlekandi unglinga í strætó á meðan þetta gengur yfir.
Hlynur Snær fékk að vera heima veikur í gær. Hann hefur verið að hósta soldið mikið undanfarið og við ákváðum að hafa hann heima í gær. Hann var svo sem ekkert ósáttur við það, notaði tækifærið óspart og spurði hvort hann mætti ekki horfa á spólu af því að hann væri svo svakalega veikur. En hann skrattaðist til dagmömmunnar í morgun, svaka glaður og kátur.

Það gerðist reyndar í fyrsta sinn í langann, langann tíma í morgun að hann vaknaði á eftir okkur hjónunum. Við lágum bara upp í rúmi og vorum að spjalla þegar hann vaknaði í sínu herbergi. Og svona líka vel sofinn og glaður (hann á það sko til að vera jafn morgunglaður og pabbi sinn). Það er bara vonandi að þetta sé byrjunin á ánægjulegri rútínu.

Við ætlum svo að fara að skipta út pallinum í garðinum … hann er orðinn gamall og lúinn. Við ætlum líka að stækka hann aðeins, bæði lengra frá húsinu og hafa hann aðeins breiðari líka. Þetta verður svona Vesturbergs-baðherbergis-project. Ég ætla að gera þetta að mestu sjálfur, en fæ vonandi einhverja hjálp frá Svavari … þetta er aðallega spurningin um að koma sér af stað og hafa undirlagið og grindina rétta. En ef einhvern langar í heimsókn og smíða með mér pall, þá er sá hinn sami velkominn hvenær sem er … ég skal meira að segja kaupa bjór (ef vilji er fyrir því).

Svo fer nú að styttast í HM ! Það er allt orðið klappað og klárt hjá okkur strákunum. Öll flug, hótel og miðar bókaðir. Miðarnir á leikinn komu til mín í síðustu viku og við fáum sæti á fínum stað. Ég hlakka mikið til að hitta strákana og skemmta okkur saman í Hamborg … það verður geðveikt !

Stuttu eftir að ég hætti þar í febrúar í fyrra hvarf allt í einu gagnagrunnurinn af þeirri síðu og allar færslur frá ágúst 2004 til júní 2005 eru horfnar að eilífu. Hef aldrei komist til botns í því hvað gerðist hjá þeim … það hefur allavega enginn viljað viðurkenna að hafa eytt gögnunum mínum. Og svo var ég víst ekki nógu mikilvægur til að taka backup af mínum gögnum. Þetta hefur allavega kennt mér að treysta ekki öðrum en professional hosting fyrirtækjum fyrir svona hlutum.

Við vorum í afmæli í dag, Tinna hans Svavars er eins árs í dag! Til haminju Tinna :) Að voru lítið annað en slagsmál á milli frændanna Emils og Hlyns Snæs. Leiðinlegt hvað þeim virðist semja illa oft á tíðum.

Í gærkvöldi vorum við með lítið matarboð. Robin (frá Hollandi) og Natalya kærastan hans (frá Úkraínu) komu í mat. Við gáfum þeim Íslenskan fisk með Mexíkósku ívafi (Örn og Björg vita hvað ég meina). Það var mjög gaman alveg.

Í dag tek ég í notkun nýtt kerfi fyrir bloggið mitt. Ég er hættur að finna upp hjólið og smíða þetta sjálfur, hef nóg annað að gera. Frítt PHP kerfi sem heitir WordPress varð fyrir valinu og hef ég flutt öll blogg og komment sem ég var með úr mínu “kerfi” í þetta (og það var miklu meiri vinna en ég bjóst við).

Þetta kerfi býður líka upp á að frúin á heimilinu geti bloggað á auðveldann hátt … þannig að það er aldrei að vita nema hún taki sig til og skrifi smá líka :)

Með þessu kerfi er hægt að búa til myndagallerí úr myndum sem eru hostaðar hjá Flickr, og mun ég taka það í notkun innan tíðar … vonandi. In the meantime, þá getið þið alltaf kíkt inn á Flickr, það er fullt af myndum þar.

Það er fullt af möguleikum í kerfinu sem ég á eftir að setja hingað inn, þetta verður soldið “bare bones” svona til að byrja með. Þið verðið bara að hafa smá þolinmæði (mikið að gera).

Enjoy !

Sumarfríið er farið að taka á sig mynd. Í júní fer ég að sjálfsögðu til Þýskalands með strákunum. Ég hlakka mikið til að hitta þá eftir langa fjarveru frá Íslandi. Við verðum í Hamborg í 3 daga saman og sjáum einn leik á HM. Í lok júlí ætlum við svo að fara viku til Spánar. Lea fékk hús leigt þar og við verðum hjá þeim í viku. Fljúgum til Madrid og verðum þar í eina nótt og keyrum svo niður til Alicante. Fljúgum frá Spáni til Íslands þar sem haldið verður á Vestfirðina og Ólöf og Mummi heiðruð með nærveru okkar í brúðkaupi þeirra. Þar höfum við fengið leigt hús með Tobba, Lilju og Badda. Það verður alveg örugglega fín Verslunarmannahelgi. Svo tekur við smá kafli í Reykjavík þar sem verður haldið upp á afmæli drengjanna minna tveggja. Sá eldri, Dagur Freyr, fær veglega afmælisgjöf að þessu sinni, við ætlum að setja legstein á leiðið hans.

Á meðan við erum á Íslandi í ágúst ætlum við að reyna að slappa af eins og við getum. Við komum til með að hitta flesta þegar haldið verður upp á fjögurra ára afmæli Hlyns Snæs, þannig að við ætlum ekki að vera á endalausum þeytingi á milli staða til að hitta alla. Það verður nóg af því um páskana.

Annars er allt gott héðan bara. Gulla byrjuð á sænskunámskeiði og gengur líka svona svakalega vel. Undirbýr sig vel fyrir hvern tíma og er örugglega algjör kennarasleikja :o

Jæja … fínt í bili … Árni Gunnar.

Ég bara man ekki eftir neinu atviki þar sem ég hef verið veikur svona lengi. Yfirleitt hef ég verið hraustur og veikst lítið. Og í þau fáu skipti sem ég fæ einhverja flensudrullu, þá hefur hún gengið yfir á tveimur dögum. En þetta maður … úff … ég bara vona að Pétur verði ekki kvefaður aftur og dæmi mig í viku veikindi eins og núna (spurning um að láta draga launin af honum í staðinn fyrir mig :o).

Robbie Fowler er kominn heim! Þetta var staðfest í gær og ég bara gæti ekki verið ánægðari með ein leikmannaviðskipti. Liverpool fær hann á “free transfer” og Rafa gerði við hann 6 mánaða samning. Ef hann stendur sig ekki, þá þarf hann að finna sér annað lið í sumar. En ég hef enga trú á því að það gerist … hann á eftir að skora eitthvað af mörkum fyrir Liverpool og sýna hinum strækerunum hvernig á að skora mörk. Vonandi :o

Lólý kom í heimsókn á miðvikudaginn, frúnni til mikillar gleði. Þær hafa gert mikið og margt saman þessa daga og notið þess að hittast eftir langa fjarveru frá hvor annarri. Í kvöld ætlum við að taka stórt skref. Barnapían okkar kemur hingað og ætlar að passa fyrir okkur í kvöld. Við ætlum að fara út að borða með Lólý. Þetta er í fyrsta sinn sem við Gulla förum út af heimilinu að kvöldi til og skiljum guttann eftir heima. Verður gaman að komast aðeins út.

Það gengur svona glimrandi vel hjá dagmömmunni. Það eru slagsmál um að fá barnið heim á daginn. Hann er hjá henni á milli 9 og 3 og hann og Lúkas (sonur dagmömmunnar) eru eltandi hvorn annann allann daginn og skemmta sér mikið saman. Ég fór um daginn að ná í hann og það er alveg magnað að sjá. Dagmamman, Therese, talar bara sænsku við hann og hann virðist skilja allt sem sagt er við hann. Og svo eru að detta inn hjá honum sænsk orð í gríð og erg. Magnað.

Jú … og svo breytti ég pínu litunum á síðunni … vonandi gott að fá smá tilbreytingu :)

Jæja … gott í bili … Árni Gunnar.