Maður er á Feisbúkk, Twitter og Flickr  … uppfærslur þangað ættu nú að nægja. Svo þegar maður býr svona nálægt öllum þá hverfur þörfin fyrir að tjá sig hérna til að segja frá hvað er að gerast í Fannafoldinni.

Svo nenni ég ekki að skrifa um bankahrun eða æsseiv … er alveg fullsaddur af þeim umræðum öllum saman.

Og hvað á maður þá að skrifa um ? Það er stóra spurningin ….

Gulla og Hlynur Snær eyddu næstum tveimur vikum í Skandinavíu, fyrst hjá Andra og Lólý í Kaupmannahöfn og svo yfir til Sviþjóðar til Evu og Staffan.

Andri Freyr Hansson afrekaði það í Tívolíinu að hætta við eitthvað barnatækið og labba út áður en það fór af stað eins og áttræð kelling … ég held ég hefði látið mig hafa það, sama hversu hræddur ég hefði verið.

Á meðan skellti ég mér hins vegar til Portúgal að setja upp bókunarkerfið mitt hjá Eco Viagens, Portúgalskri ferða- og umboðsskrifstofu. Þetta er gríðarlega stórt skref fyrir ZEUS og gaman þegar öll vinnan sem maður hefur lagt á sig undanfarin ár er farin að bera árangur.

Ég tek hins vegar til mín orð viturs manns sem benti mér góðlátlega á að missa ekki sjónar á verkefninu, þó að vel gangi um stundarsakir.

Við strákarnir förum á næsta ári á alvöru keppnina, HM. Við fengum miða á leik í 16 líða úrslitum í Cape Town þann 29. júní 2010.

Þessi mynd hér fyrir neðan er ein myndanna í þessari seríu … þær eru hver annarri flottari

- Skoða allar myndirnar

Og þá kinkaði ljóskan við hliðina á honum kolli: “Ég er sammála”.

Ég held það sé varla hægt að sigra leik öðruvísi en að þínir lykilleikmenn séu betri en hinir … en hvað veit ég svo sem …

Hlynur Snær fékk að vaka lengur og horfa á leikinn … hann var eitthvað að skoða fótboltaspilin sín þegar Messi skoraði seinna mark Barcelona. Við Gulla fögnuðum helling, en það var eins og hann fattaði ekki neitt … var alveg í sínum heimi með spilin sín. Ég sagði við hann að Messi hefði skorað, og hann rétt leit upp og sagði: “Ég veit”. Og hélt áfram að skoða silfur Torres spilið sem hann fékk í dag.

Iceland Express er hætt að fljúga beint til Stokkhólms og fer bara til Gautaborgar.

Það þýðir að Icelandair situr eitt að kjötkötlunum á þessari leið og það fer sko ekkert á milli mála.

80.000 krónur fyrir Gullu og eitt barn takk fyrir. Á mann! 160.000 fyrir þau bæði. Þetta er bara gjörsamlega óskiljanlegt. Á sama tíma kostar á milli 30 og 40 þúsund fyrir manninn til Köben.

Á fimmtudaginn var Hlynur Snær sendur heim úr skólanum með mikla magaverki. Þeim linnti ekkert þann daginn eða á föstudaginn og við fórum með hann á Barnaspítalann á föstudagskvöldinu þar sem hann var rannsakaður hátt og lágt.

Ekkert virtist koma út úr þessu með magaverkina, en það sem þau höfðu meiri áhyggjur af var mjög hár blóðþrýstingur hjá honum. Hann og Gulla voru á spítalanum yfir nótt en fengu að fara heim á laugardagsmorgunn, þar sem verkjunum hafði linnt og þrýstingurinn minnkað eitthvað örlítið.

Laugardagurinn var bara fínn hjá honum, hann sofnaði sáttur, en um 11 leytið komu verkirnir á ný, en nú töluvert harðari og lengur í einu. Við ákváðum að fara með hann aftur upp á spítala til að fá þrýstingsmælingu og tékk. Þrýstingurinn var við það sama og kvöldið áður, en sem betur fer náði hann að sofna niðri á spítala og við fórum því með hann heim.

Verkirnir hafa ekki komið aftur, sem betur fer, en hái blóðþrýstingurinn er það sem læknarnir eru að skoða núna.

Það geta verið margar orsakir á háum blóðþrýstingi hjá börnum og þess vegna fór Hlynur í ómskoðun í morgun sem verður lesið úr seinna í dag.

Hún Erla besta frænka hjálpaði okkur í atvinnuviðtölum og við erum búnir að ráða framkvæmdastjóra sem á að koma þessu á koppinn. Þetta hefur hins vegar verið miklu, miklu meiri vinna fyrir mig en ég hélt, en vonandi verður þetta að einhverju spennandi í framtíðinni :)

Annars er bara allt í sínum farvegi. Gulla að vinna, Hlynur Snær í skólanum og ég að drukkna (að venju).

Hlynur Snær er gjörsamlega að brillera á píanóið finnst mér, alveg ótrúlega fljótur að pikka upp lögin sem hann á að læra og virkilega gaman að sjá hvað hann verður glaður þegar vel gengur. Stundum soldið ströggl að halda honum við efnið ef að illa gengur, en rosalega gaman engu að síður.

Ég þarf víst að vera á undan honum og á bara fullt í fangi með að læra lögin svo ég geti kennt honum … en mér finnst þetta rosalega gaman að læra á píanóið, er að reyna að læra önnur lög líka, og það er svaka stuð.

Ég er ekkert sérstaklega kúl í lagavali finnst fjölskyldunni … Axel F, Final Countdown og Star Wars Theme eru lög sem ég spila í tíma og ótíma við mikla gleði allra.

Ég fattaði svo að YouTube er ótæmandi uppspretta fyrir píanókennslu … magnað þetta internet :)

Ég var rétt um 96 kg þegar ég byrjaði, en náði takmarkinu mínu núna í dag, viktaði mig í hádeginu og var 85,3 kg. Ég setti mér takmark um að ná 85 fyrir áramótin, og er ekki nema mánuði á eftir áætlun sem ég er ekkert að væla yfir.

Ég hef notað MSN statusinn minn sem gott aðhald. Ég set kílóatöluna þar inn, og það er alveg djöfullegt þegar hún fer upp en ekki niður … maður er að segja öllum heiminum frá því, mjög gott aðhald.

En sem sagt … 11 kg farin, og nú er bara að halda áfram og byggja upp meiri vöðva og minnka björgunarhringinn ennþá meira :)

Það er vetrarfrí hjá Hlyni Snæ í skólanum nú á fimmtudag, föstudag og mánudag. Pabbi í Vestmannaeyjum bauðst til að taka hann, og þáðum við það með miklum þökkum. Hann hlakkar rosalega til að fara, finnst alltaf gaman að koma til afa í Vestmannaeyjum, og mesta sportið að sjálfsögðu að fljúga einn :)

Amma hennar Gullu, Jakobína, eða Amma Bína eins og hún er kölluð á mínu heimili varð níræð á sunnudaginn. Ég tók nokkrar myndir af henni og Hlyni Snæ og setti á Flickr síðuna.

Sá sunnudagur var fjórði sunnudagurinn í röð sem við fórum í afmæli kl. 15:00. Fyrstur var Guðjón Trausti, svo Trausti Þór, svo Rúnar og svo amma Bína. Veit eiginlega ekki alveg hvað við eigum að gera á sunnudaginn kl. 15:00 … held það sé ekkert afmæli þá. En það er afmæli á laugardaginn kl. 11 … við kannski breytum klukkunni og dagatalinu og blekkjum okkur til að halda að það sé sunnudagur.

Ruslpósttilraun

Fyrir um það bil mánuði síðan prófaði ég að hætta að eyða pósti úr ruslpóstsíunni sem Google svo góðlátlega setur allann ruslpóstinn minn í. Og niðurstaðan eftir mánuð? Næstum 3.500 ruslpóstskeyti. Þrjúþúsundogfimmhundruð skeyti með tilboðum um typpalengingar, viagra tilboð (er ég orðinn svo gamall?), endalaust Nígeríusvindl og ég veit ekki hvað og hvað … Mér finnst alveg merkilegt að það sé virkilega til fólk sem annað hvort svarar svona pósti eða tekur þá trúanlega. Þetta hættir ekki fyrr en allir í veröldinni geta ignorað þessa pósta.