Hvar endar þetta eiginlega … ??

Ég er orðinn viðskiptavinur ríkisins. Hverjum hefði dottið það í hug þegar við fluttum heim frá Svíþjoð fyrir tæplega einu og hálfu ári síðan.

Ég stofnaði fyrirtæki, var gríðarlega bjartsýnn á framtíðina, allt á uppleið alls staðar.

Núna þarf ríkið að kaupa viðskiptabankann minn, lánið sem við tókum fyrir húsinu hefur stórhækkað, á sama tíma og verð hússins hefur lækkað um annað eins. Þeir peningar sem við Gulla höfðum unnið okkur inn þessi rúmlega 11 ár sem við höfum búið saman hafa verið þurrkaðir út á 9 mánuðum.

Svakalegt.

EN … það þýðir ekki að væla, eða vera bitur yfir því sem búið er. Maður verður að reyna að vinna sem bestu út úr þeim spilum sem maður hefur á hendi.

Við höfum ennþá 10 fingur og 10 tær, Hlyni Snæ gengur vel í skólanum og ég get farið að hitta vini mína og spila fótbolta á eftir. Hvað þarf maður meira ??

Með von um batnandi tíð með blóm í haga … :)