Þegar Gulla fór með stubbinn á leikskólann í morgun, þá fóru þau að leita að inniskónum hans, þeir voru ekki í hólfinu.
Gulla leitaði þarna í kring en fann þá ekki. Spurði Hlyn Snæ hvort hann vissi hvað hann hefði gert við inniskóna í gær.
Og þá svaraði sá litli: "Nú í ruslalúguna, mig langaði ekki að eiga þá lengur".
Kræst …
Fékk þennann frá Eygló frænku í gegum Eygló mömmu … langaði að senda hann hingað inn:
Tveir gaurar frá Íslandi dóu og vakna upp í helvíti.
Daginn eftir tékkar Djöfullinn sjálfur á þeim og sér að þeir sitja í mestu makindum í úlpunum sínum, með vettlinga og húfur og orna sér við eldinn. Djöfullinn spyr þá hvað þeir séu eiginlega að gera? Er ekki nógu heitt í helvíti fyrir ykkur ?
Gaurarnir svara, "Sko, þú veist, við erum frá Íslandi, landi snjós,íss og kulda. Við erum bara ánægðir að fá smá yl í kroppinn."
Djöfullinn ákveður að þeir séu nú ekki að þjást nóg svo hann skrúfar upp hitann.
Morguninn eftir kíkir hann aftur á gaurana tvo og þarna sitja þeir ennþá í úlpum með húfurnar og vettlingana ennþá á. Það er nú ferlega heitt hérna, finnst ykkur það ekki?
Aftur svara gaurarnir því til að þeir komi jú frá Íslandi, landi snjóa, íss og kulda, við erum bara fegnir að fá smá yl í kroppinn !
Það fór nú að fjúka nett í Kölska og hann ákveður að jafna örlítið um þessa tvo gaura. Hann fer og setur hitann á "Fáránlegt". Fólk fer að veina og væla út um allt helvíti. Hann fer svo og kíkir á gaurana tvo frá Íslandi og sér að þeir eru komnir á skyrtuna með upprúllaðar ermar og eru að grilla pylsur og þamba bjór.
Djöfsi verður steinhissa " Allir hérna inni þjást og veina, en þið virðist bara njóta ykkar?"
Já sko, það er svo hrikalega sjaldan að við fáum svona gott veður heima á Íslandi, að við urðum bara að grípa tækifærið og grilla aðeins og súpa á öli.
Alveg óður af bræði, strunsar Djöfsi í burtu og hugsar málið. Að lokum kemst hann að þeirri niðurstöðu að þessir gaurar hafi verið að krókna allt sitt auma líf á Íslandi, þess vegna eru þeir svona kátir yfir öllum hitanum. Djöfullinn ákveður að skrúfa fyrir allan hitann í öllu Helvíti.
Daginn eftir er orðið ískalt í Helvíti og héla og grýlukerti allsstaðar. Fólki orðið svo kalt að það gat varla gert neitt annað en veinað og aumkað sér yfir kuldanum. Tannaglamur yfirgnæði samt að mestu veinin. Djöfullinn glotti með sjálfum sér og fór að kíkja á gaurana frá Íslandi.
Þar eru þeir komnir í úlpuna, húfuna og með vettlingana á sér…en Djöfsa til mikillar furðu, eru þeir að hoppa og öskra Ole ole af mikilli gleði !?
Ég skil ekki, sagði Djöfsi, ég skrúfaði hitann upp úr öllu valdi og þið voruð bara ánægðir og núna er bullandi frost hérna og þið bara öskrandi af gleði?? Hvað í fjárnaum er að ykkur tveim?
Íslendingarnir líta á Djöfsa með spurn í augum, " Ha, veistu það ekki? Ef það frýs í helvíti, þýðir það bara að Íslendingar hafa unnið Dani loksins á Parken!"
Hlynur var rétt í þessu að enda við að kyssa mig 100 kossa … allir samviskusamlega taldir upphátt.
Jólaskrautið er á leiðinni upp … Gulla er alveg í essinu sínu að setja upp seríur, kertastjaka, jólasveina og skemmtilegheit. Hlynur Snær er ekkert smá kátur með þetta allt saman, fær að hafa aðventuljós í herberginu sínu.
Prófunum er loksins lokið hjá Gullu … hún stóð sig eins og hetja, enda ekki við öðru að búast frá þessari kjarnakonu. Nú er bara eftir að klára lokaverkefnið og smá tollverkefni og þá er þessu lokið.
Ég er víst búinn að pirra hana soldið mikið með því að vera búinn að ákveða hvað ég ætla að gefa henni í jólagjöf … hún er svo forvitin að þetta er ekki að leggjast mjög vel í hana að þurfa að bíða í heilann mánuð til að fá að vita :)
Svo var sett met hér á heimilinu í morgun … sofið til rúmlega hálf 11 ! Við Gulla vorum vöknuð og lágum bara uppi í rúmi í rólegheitunum þegar heyrðist úr herberginu hans Hlyns: "Er kominn dagur?". Hann hafði ekki hugmynd um að klukkan væri orðin svona mikið. Hann hefur oft talað um að hann langaði að sofa lengur en 10, og í morgun tókst það loksins.
Ég tek þátt í samfélagi sem ber nafnið Channel9 og er haldið úti af Microsoft. Þegar ég var á TechEd í Barcelona var tekið viðtal við mig og 2 aðra stráka sem eru þarna inni líka. Viðtalið var birt á síðunni núna í vikunni. Svo spunnust um það umræður á spjallborðinu … ef einhver hefur áhuga.
Hlynur Snær stóð sig eins og hetja á tónleikunum í dag. Hann söng 2 lög með hinum í fiðluhópnum og svo spiluðu þau Kópavogur hopp stopp af miklum tilþrifum. Maður varð ótrúlega stoltur af stráknum.
Það var reyndar hund erfitt fyrir hann að sitja kyrr og bíða eftir að kæmi að honum, en það hafðist … svo var jólaball á eftir. Kertasníkir mætti á svæðið við mikla kátínu þes stutta.
Ekki skemmdi fyrir að Nína Guðrún, dóttir Arnars frænda, spilaði á tónleikunum líka. Hún er að læra á píanó hjá Suzuki tónlistarskólanum. Hún stóð sig líka eins og hetja, spilaði fjórhent með annarri stelpu.