Jæja … þá er helgin liðin og maður kominn til vinnu aftur. Við vorum á Tálknafirði um helgina í frábæru veðri á ættarmóti. Niðjar langömmu minnar og langafa frá Ólafsvík hittust á Tálknafirði þar sem Jón Bjarnason (bróðir ömmu minnar) býr. Pabbi, Lea og Sigurlaug Birna voru líka, ásamt um 2/3 af allri ættinni. Það var grillað, farið í fótbolta, spilað og leikið alla helgina, og það var meiriháttar gaman. Gaman að hitta þetta fólk sem maður hefur ekkert samband við og hittir aldrei.

Annars fer allur aukatími í að mála og fínisera húsið þessa dagana. Um leið og við komum heim í gær fór ég upp í hús og kláraði eftri hæðina (nánast). Það er einn loftlisti sem á eftir að taka í gegn þar, og þá er hún klár. Mest öll undirbúningsvinna er búin niðri, og þá getum við farið að mála þar. Ég penslaði loftið þar í gærkvöldi og pabbi ætlaði að byrja að rúlla það í dag. Þarf örugglega 3 umferðir, málningin er svo þunn og þekur illa.

Vinnan gengur vel að venju … ég næ bara ekki að afkasta nógu miklu af því að allur aukatími fer í húsið, en það stendur til bóta þegar við verðum loksins flutt inn …. get ekki beðið. Skipið kemur á morgun með dótið og vonandi fæ ég það út fyrir helgina.