Jæja … nú styttist í sumarfríið. Ég vinn þessa vikuna og svo er ég kominn í þriggja vikna frí. Við fljúgum til Spánar og verðum þar í viku með pabba, Leu og Sigurlaugu. Við erum bara að vona að það verði ekki of heitt. Svo taka við 2 vikur á Íslandi. Förum í brúðkaup um verslunarmannahelgina vestur í Breiðuvík, rétt hjá Látrabjargi. Mummi og Ólöf hin norsku ætla að hnýta hnútinn stóra (eitthvað sem fáir af okkar bestu vinum hafa gert … hmm …). Einnig verður haldið upp á afmæli litla stubbs … í tveimur hollum, af því að við þekkjum allt of mikið af fólki.
Um síðustu helgi fórum við í heimsókn til Línu Langsokk, Emils í Kattholti og fleiri persóna úr bókum Astrid Lindgrén. Þriggja tíma keyrsla, hvora leið, en mikil gleði hjá yngsta meðlimnum í fjölskyldunni sem gerði þetta allt þess virði. Hann var enn spenntari en í fyrra, því nú er hann að sjálfsögðu árinu eldri og búinn að kynnast þessum persónum betur eftir endalausann lestur og myndahorf undanfarið ár. Við fjárfestum í ferða-DVD spilara fyrir Hlyn Snæ, þannig að hann gat horft á DVD á leiðinni, sem hitti heldur betur í mark.
Ég skil eiginlega ekki alveg af hverju við erum að fara til Spánar … þvílíkur hiti búinn að vera hérna í sumar. Alveg upp yfir 30 stigin. Og þá verður garðurinn okkar eins og suðupottur … nánast ekki hægt að vera úti. En miðað við blautu gleðina heima, þá erum við ekki að kvarta :)
Lilja og Oliver eru svo að koma á morgun og verða eitthvað fram í næstu viku. Tobbi greyið skilinn eftir heima að vinna fyrir salti í grautinn … en ég nýti tækifærið lílka og verð að vinna mest allann tímann. Það verður örugglega stuð hjá strákunum að leika sér saman.